Itorero Indangamirwa VII ryatangiye

Kuri iki cyumweru tariki 13 Nyakanga 2014, nibwo urubyiruko rurenga 229  ruba cyangwa rwiga mu mahanga rwahagurutse kuri Sitade Amahoro i Kigali rwerekeza i Gabiro mu Karere ka Gatsibo , Intara y’iburasirazuba ,  aho bagiye  kumara ibyumweru bibiri mu  Itorero Indangamirwa icyiciro cya karindwi.

Mu ijambo rye Minisitiri w’ubutegetsi bw’igihugu, Musoni James,  yabifurije ikaze mu gihugu cyababyaye. Yakomeje ababwira ko iri torero ari umwanya  bagenewe wo kumenya byinshi ku gihugu,  abasaba kutazapfusha ubusa igihe bazamara i Gabiro, kandi indangangaciro baziga zikazabafasha mu myitwarire yabo ya buri munsi.

Rucagu Boniface uyobora Komisiyo y’itorero ry’igihugu  yababwiye ko mu byo bazatozwa harimo  indangagaciro z’ubunyarwanda, asobanura ko izi ndangagaciro zari  zaratakaye kubera Abakoloni, yemeza ko  kongera kuzigisha abanyarwanda bifite akamaro . Yavuze ko by’umwihariko urubyiruko ruba mu mahanga rwigishwa indangagaciro kugirango bazashobore gukomeza kugaragaza  isura nziza y’u Rwanda mu mahanga.

Mu ma saa kumi n’imwe z’umugoroba nibwo uru rubyiruko  rwasesekaye  mu Kigo cya  Gisirikare I  Gabiro . Rukaba rwahawe ikaze na  Brig Gen  Emmanuel  Bayingana, Visi Perezida wa Kimisiyo y’igihugu y’Itorero    wababwiye  ko  baje kwiga mbere na mbere indangagaciro z’umunyarwanda .

 

Urubyiruko rwitabiriye itorero rukaba rwagaragaje ko rwiteze ibyiza byinshi  muri iri torero harimo kumenya amateka  y’igihugu, indangagaciro z’ubunyarwanda, ndetse bagaragaje  ko n’imyitozo bazahabwa izabafasha.

Iri torero ryahawe izina ry’ubutore INDANGAMIRWA riba buri mwaka guhera muri 2008 . Ubu ni inshuro ya karindwi ribaye. Izina  “Indangamirwa” rikaba ryaratoranyijwe na  Komisiyo y’Igihugu  y’Itorero  mu rwego rwo kwerekana   ko igihugu kibarangamiye nk’urubyiruko ruzavamo abaturage n’abayobozi b’ejo hazaza beza . Iri torero  rizafungurwa ku mugaragaro tariki 15 Nyakanga 2014 rikaba rizasozwa tariki 26 Nyakanga 2014.